夕陽下的竹林

如果天堂唔喺外面……

《Soul/ 靈魂奇遇記/ 靈魂急轉彎》觀後感

佛陀與Pixar

生命嘅長短有幾長？ 80年？非也；60年？非也；唔會係一年啩? 非也。佛陀說：「生命嘅長短唔係以時間計算，係喺一呼一吸之間。」

人生嘅火花在於乜嘢？最有熱情嘅嘢？唔係；人生目標？唔係；夢想？唔係。Pixar話：「人生嘅火花唔係一直所追求緊嘅嘢，最重要嘅係，你要識得即興。」

《靈魂奇遇記》嘅故事係講：一個唔想面對人生嘅人，慢慢變到願意出世；另一個唔願意結束生命嘅人，漸漸接受死亡。而我認為兩者轉變嘅原因，都係佛陀同Pixar異曲同工所講嘅「活在當下」。

幸福只係喺此時此處

22號唔想出世嘅原因，相信大家都唔難明白。的確，人世間實在係有太多嘅痛苦，唔單止身體會因為意外、疾病而受傷，心靈亦都會因為各種各樣嘅人同事而備受打擊。有太多太多嘢都唔到我哋去控制，甚至連預期都做唔到。於是喺成長嘅過程當中，我哋慢慢開始唔畀自己去期望。唯有當我哋冇期望，先至唔會有失望。但偏偏已經「大切大悟」嘅22號，當用到阿祖嘅身體接住從天而降嘅花瓣嘅時候，佢感受到當下嘅美麗，一份意想不到嘅美麗。

如果「人生不如意事十常八九」係真嘅話，咁都未必係一件非常差既事。因為大家都似乎揾到一、兩件好珍貴嘅人事物，足而令到我哋都選擇繼續活落去。

阿祖千方百計要去表演嘅原因，同樣好容易理解。人生嘅目標，想當然就係要實現抱負，能夠做到最有熱情嘅嘢，咁樣就應該能夠帶嚟幸福同埋滿足。不過，當阿祖完成夢寐以求嘅演出之後，佢竟然發覺一切冇變過……一片迷茫嘅佢，坐喺屋企座琴前面，攞出褲袋裏面嘅麵包、pizza、糖、線轆。依個時候，佢終於發現——原來令到佢生命變得美好嘅，唔單止係音樂藝術，仲有美食、其他人嘅共鳴、親情、 對世界嘅好奇

能唔能夠去為日常嘅景象而感動，又或者喺自己嘅褲袋、衫袋、甚至床下低裏面揾到小確幸嘅證明。我諗其中嘅關鍵就在於，我哋願唔願意喺當下去選擇好好感受生命。

識得郁嘅鹹魚，都係死魚

周星馳大大聲提出一個靈魂拷問：「人無夢想，同條鹹魚有咩分別？」

Pixar淡然咁樣回答：「人有夢想，都可能只係一條識得郁嘅鹹魚。就算揼佢落個海，佢都可能仲要問一句：『究竟個海喺邊度！？』」

「追夢」係一個近乎陳腔濫調嘅主題，「活在當下」又係老生常談。有趣嘅係，《靈魂奇遇記》一開始令你以為佢係講追逐夢想，但到頭來話畀你聽：追逐夢想唔係最重要！活在當下，感受生命裏面一切細微嘅小確幸，先至係更加有價值。依個表達形式，就令成套劇喺平凡之中顯得不平凡。

人唔可以無夢想，同時更加唔值得畀夢想控制住你。如果你係想開心，係唔需要等到夢想達成先至高興。如果你達成夢想係為咗開心，其實呢一刻就可以選擇幸福快樂。講到依度，令我諗返起一本介紹阿德勒心理學精神嘅書，叫做《被討厭的勇氣》。裏面其中一有部份講到兩種形態嘅人生。用我自己嘅演繹，我會分別叫佢地做「賽跑型」同「跳舞型」。

「賽跑型」係以目標為本，過程唔重要，由於過程需要忍受痛苦，所以最好就走捷徑。唯獨完成目標，之前所做既一切先至會有價值，否則所有付出都係白費。快樂係目標達成嘅一剎那。完成一個目標之後，又會再定新目標，繼續奮鬥；

「跳舞型」就係將過程視為目標本身，都會有一個前進嘅方向，但只係一個大致的方向，更著重隨心而行。同時，依種型態嘅人會覺得每一步都係享受，因為跳舞就係為咗過程。快樂係當下已經擁有，而且持續不斷。

好明顯，阿祖就係屬於「賽跑型」。當然，現實中嘅人喺完成夢想之後，係咪咁快就會覺得歸於平淡呢？我又覺得好難會咁嘅，呢個位可以當係一種戲劇嘅手法，所以《靈魂奇遇記》係唔係想講，夢想帶嚟嘅成功，真係咁不值一提呢？我會話，絕對唔係。佢只係想講「賽跑型」嘅成功喜悅相對地只有「一剎那」，遠遠唔夠「跳舞型」喺過程中嘅漫長享受嚟得持久同穩定。無人會反對夢想成功可以令人好快樂，但係喺過程之中你又能唔能夠幸福快樂呢？似乎，就係更加值得深思嘅問題。

只係識得「追夢」，都不過係一條識得郁嘅鹹魚，本質都係死魚，因為大家都係無咗「生命」。

「活在當下」超離地？

感悟完依個咁正嘅偉論之後，我行出戲院，就馬上去實踐所謂「活在當下」嘅理念啦！不過，當我行到去馬路邊，聽到嘈到不得了嘅車聲，聞到又臭又熱嘅廢氣…….我就喺度諗，呢套戲到底都係咪太離地呢？ 我實在冇辦法去感受生活之中嘅每一個所謂小確幸，實在係無法子每一秒去感恩呀！唔通我可以好似主角阿祖喺片尾咁樣，一早起身打開個門，就見到綠草如茵嘅花園，又有啲和暖嘅陽光照落嚟，然後悠然生起一種詩情畫意？ 唔可以囉！香港係一個現實嘅石屎森林，咁所以，活在當下依家嘢，似乎真係唔關我事？

後來，我又諗，如果攞番套戲嘅精神出嚟睇，或者發掘多啲幸福，都已經唔錯。譬如：喺行完嗰條好污糟又好嘈嘅馬路，返到屋企之後，我可以欣賞下室內嘅擺設，感恩吓自己能夠有瓦遮頭。好好休息嘅同時，又可以整杯鍾意嘅嘢飲。其實願意發掘多啲當下生活嘅小小幸福，似乎都已經好足夠，未必需要每一分、每一秒去做吖。
 

原來唔係「貼地」，係「貼心」

有趣嘅係，睇完套戲一個月之後，發生咗件事，令我對唔太貼地嘅「活在當下」，多咗一份體驗：

嗰一日心情好好，又好難得可以準時收工，多咗一份平時無嘅閒情。無意喺巴士車窗睇到出面嘅太陽。依個畀少少雲遮住嘅太陽，同平時比，完全無特別，之但係我感到一份莫名嘅感動，幾滴眼淚不其然流咗落嚟。我係一個從來都覺得自然景色好普通，甚至有少少睇到悶嘅人。嗰一刻好似突然了悟咗「美麗」嘅真正意義：｢生命之中一切嘅美，從來都唔係外在嘅事物所決定。美嘅根本在於我哋嘅內心。」所以，我簡直覺得嗰次見到嘅，唔係陽光，而係佛光至真！真係忍唔住要講一句：「阿彌陀佛！善哉，善哉！」

最後，想用一個比喻嚟做結束：只要我哋用感恩作為畫筆，配上身邊珍貴嘅人、事、物所構成嘅顏料，一筆又一筆咁慢慢畀心機去畫。我相信經年累月，就可以畫得出一幅豐盛而又美麗嘅生命畫作。祝願我哋都可以喺生命結束嘅時候，為到作品而感到自豪，而且能夠好好享受畫畫嘅珍貴旅程。

P.S. 為咗支持廣東話，今次特登用咗廣東話嚟寫文。無錯，推動廣東話係我依位香港人既使命！當然，喺得依個部落格做推廣，大家就知道我係比較重視過程嘅朋友啦。